კულუარული ინფორმაციის თანახმად, რუსი შოუმენის, ვლადიმირ პოზნერის სკანდალური თბილისური დაბადების დღის ერთ-ერთი ორგანიზატორი ნინო ანდრონიკაშვილი იყო.
ნინო “პრაიმამბებთან” ამ ინფორმაციას უარყოფს, თუმცა ადასტურებს, რომ დებ მირიანაშვილებთან მეგობრობს. გმობს პოზნერის ცნობილ ფრაზას – “აფხაზეთი არასდროს გახდებოდა საქართველო” და თვლის, რომ მიუღებელია ამ ფრაზის მთქმელი ადამიანის აქ სტუმრობა.
ნინო ანდრონიკაშვილი: – მე არც ამ წვეულების სტუმრების სიაში ვყოფილვარ და არც ორგანიზატორი გახლდით. ეს წვეულება პოზნერის სტუმრების ირგვლივ იყო დაგეგმილი. ის ჩემი მეგობრების, მირანდა და მედიკო მირიანაშვილების მეგობარია, პირადად არ ვიცნობ.
ვინ იყვნენ დაპატიჟებულნი, არ ვიცი. ვერაფრით ვერ დაგეხმარებით. წარმოდგენა არ მაქვს, რა ხდებოდა.
მირანდა და მედიკო მირიანაშვილები არიან პატრიოტები, უყვართ საქართველო. ისინი ჩვენი ქვეყნის განვითარებისთვის ზრუნავენ. მათთან მისვლა ჩვენთვის, მეგობრებისთვის, ყოველთვის დღესასწაულია.
– და პოზნერის საქართველოში ვიზიტიც დღესასწაულია?
– პოზნერზე ვერაფერს გეტყვით. აპოლიტიკური ვარ.
– პოზიციის დაფიქსირებისთვის პოლიტიკურობა არც არის საჭირო.
– როგორც ამ ქვეყნის მოქალაქე, მე ვარ პატრიოტი. ის ციტატა, რომელიც საქართველოს წინააღმდეგ იქნება, ჩემთვის მიუღებელია. შესაბამისად მისი მთქმელიც.
პოზნერის გარდა, აქ ჩამოსულები იყვნენ საქართველოზე შეყვარებული – რუსი საზოგადო მოღვაწეები, მუსიკოსები, პიანისტები, მეცნიერები. სიყვარულით იყვნენ ჩამოსულები და “ცოტა” გაუგებრობაში მოჰყვნენ.
