პრეზიდენტის რეზიდენციამ, სასაჩუქრედ, ანიტას ლექსების კრებულის საკმაოდ დიდი პარტია შეიძინა. ამ ინფორმაციას გარდაცვლილი გოგონას ბებია, თამუნა გლურჯიძე გვატყობინებს.
ანიტა ფაცაციას, ბებიამ, წლისთავზე, ლექსების კრებული – “მოფერება ლექსებად” უძღვნა. ცოტა ხნის წინ თამუნამ ეს კრებული სალომე ზურაბიშვილს საჩუქრად პირადად გადასცა. როგორც მან გვითხრა, სწორედ მაშინ აღუთქვა პრეზიდენტმა კრებულის გარკვეული რაოდენობის შესყიდვა.
თამუნა გლურჯიძე: – ამიერიდან ქალბატონი სალომეს მეშვეობით ჩემი გოგო უამრავ საინტერესო ადგილას დაიდებს ბინას. მისია შესრულდა, ანიტა 500 ოჯახში შევიდა.
პრეზიდენტთან შეხვედრაზე რომ ვიყავი, მაშინ მითხრა, რომ უკვე გადაწყვეტილი ჰქონდა, კრებულის გარკვეული ოდენობის შეძენა.
როგორც მითხრა, შესაბამისი შეხვედრების დროს, სასაჩუქრე პაკეტს ჩემს კრებულს დაამატებს.
რა თქმა უნდა, არც ველოდი ასეთ შემოთავაზებას, უფრო შოკი იყო… რეზიდენციიდან რომ გამოვედი, მერე და მერე უფრო გავაცნობიერე, რა სასწაული ხდებოდა ჩემს თავს…
საერთოდ, ემოციური შეხვედრა შედგა. რომ მეგონა ორი წუთით მიმიღებდა, ოცი წუთი დავყავი პრეზიდენტის კაბინეტში…
